Investimi prej 1 milion eurosh i TAV Maqedoni sjell kontrolle më të shpejta, më efikase dhe me standarde të larta të sigurisë, duke përmirësuar përvojën e udhëtarëve dhe duke e harmonizuar aeroportin me qendrat kryesore ajrore në botë.
Aeroporti Ndërkombëtar i Shkupit, i menaxhuar nga TAV Maqedoni, degë e TAV Airports dhe pjesë e Grupit ADP, ka investuar 1 milion euro për blerjen e dy pajisjeve të reja për kontroll të avancuar të bagazhit të dorës me tomografi kompjuterike (CT), së bashku me dy shirita të rinj të automatizuar, të prodhuar nga kompania britanike Smiths Detection.
Kjo pajisje e teknologjisë më të avancuar do të përmirësojë standardet e sigurisë, do të rrisë efikasitetin e kontrolleve të sigurisë dhe do të mundësojë qarkullim më të shpejtë të udhëtarëve, në përputhje me standardet më të fundit evropiane dhe ndërkombëtare.
“Me këtë teknologji, TAV Maqedoni e pozicionon Aeroportin Ndërkombëtar të Shkupit përkrah qendrave të mëdha evropiane si Frankfurti, Heathrow dhe Cyrihu, ku këto sisteme tashmë janë standard. Të njëjtat pajisje përdoren edhe në aeroportet kryesore në SHBA, Izrael dhe Indi, gjë që dëshmon besueshmërinë dhe pranimin e tyre në nivel global.
Çfarë do të thotë kjo në praktikë?
Së pari, siguri më e madhe. Këto sisteme ofrojnë saktësi shumë më të lartë në zbulimin e kërcënimeve të mundshme dhe zvogëlojnë ndjeshëm nevojën për kontrolle shtesë fizike.
Së dyti, përvojë më e mirë për udhëtarët. Kontrolli i sigurisë do të jetë më i shpejtë, koha e pritjes më e shkurtër dhe komoditeti më i madh. Ndryshe nga më parë, udhëtarët nuk do të kenë më nevojë të nxjerrin laptopët, tabletët, telefonat mobilë dhe lëngjet nga bagazhi i dorës, pasi këto sende mund të mbeten brenda çantës gjatë kontrollit.
Së treti, kapacitet më i madh i aeroportit. Teknologjia e re na mundëson të përpunojmë deri në dyfish më shumë udhëtarë në orë për çdo linjë kontrolli. Kjo është thelbësore për përballimin e rritjes së trafikut, veçanërisht gjatë sezonit të pikut”, deklaroi drejtori i përgjithshëm i TAV Maqedoni.
Ai shtoi se ky projekt është pjesë e një cikli më të gjerë investimesh që synon forcimin e mëtejshëm të sigurisë së aeroportit përmes përmirësimit të vazhdueshëm të sistemeve dhe trajnimit të personelit.
“Ky projekt është pjesë e një cikli më të gjerë investimesh në sigurinë e Aeroportit Ndërkombëtar të Shkupit. Vitin e kaluar realizuam edhe dy projekte të mëdha shtesë me vlerë totale prej 1.930.000 eurosh, të cilat e forcojnë edhe më tej sistemin tonë të sigurisë.
I pari është një sistem krejtësisht i ri i videombikëqyrjes, i cili rrit ndjeshëm aftësinë tonë për parandalimin, zbulimin dhe reagimin e shpejtë ndaj incidenteve të sigurisë, me qëllim mbrojtjen maksimale të udhëtarëve, punonjësve dhe infrastrukturës.
I dyti është një sistem modern për trajnim, testim dhe certifikim të personelit të sigurisë, i cili siguron zhvillim të vazhdueshëm profesional përmes simulimeve reale dhe metodave bashkëkohore të vlerësimit, plotësisht në përputhje me standardet më të larta ndërkombëtare”, tha drejtori i përgjithshëm i TAV Maqedoni.
Me këto investime, TAV Maqedoni konfirmon qartë përkushtimin e saj strategjik për të krijuar një aeroport modern, të sigurt dhe konkurrues, që i përmbush dhe i tejkalon standardet evropiane.
Kompania do të vazhdojë të investojë në teknologji, infrastrukturë dhe shërbime që përmirësojnë cilësinë e udhëtimit dhe forcojnë pozitën e Aeroportit Ndërkombëtar të Shkupit si një qendër moderne rajonale e aviacionit.
