Deputetja e Partisë Demokratike të Kosovës (PDK), Vlora Çitaku, i ka reaguar kryeministrit Albin Kurti, duke i thënë se fatmirësisht Kosova nuk është vetëm e tij.
Në një adresim drejtuar qytetarëve gjatë të premtes për çështjen e presidentit, Kurti ndër të tjera u shpreh se Kosova nuk është vetëm e tij pasi la të kuptohet se vetëm ai po përpiqet të gjejë zgjidhje për president – kur kanë mbetur edhe katër ditë afat.
Në reagimin e saj, Çitaku i kërkon Kurtit të “qetësohet”, duke theksuar se, pavarësisht siç shprehet ajo “kapjes së institucioneve”, Kosova nuk i përket vetëm atij.
“Kryeministër, qetësohu. Përkundër kapjes së institucioneve, Kosova fatmirësisht nuk është vetëm e jotja. Si do t’ia shpjegosh popullit që t’i dhanë 51% të votave se nuk dëshiron e nuk din të qeverisësh? Këtë e di ti, mirëpo çfarë di unë është se ti do ta marrësh përgjigjen e merituar nga ta. Prandaj, lutja ime është krejt e sinqertë: Ose qeveris, bashkëpuno e jepi drejtim Kosovës, ose lësho rrugë e lëri më ankesat, krizat e lojërat fëmijërore në kurriz të qytetarëve”, ka shkruar ajo.
Në fund të reagimit, Çitaku thekson se përgjigjja përfundimtare do të vijë nga qytetarët në zgjedhje, duke shtuar se vota e tyre do të përcaktojë drejtimin e ardhshëm politik të vendit.
“Ti nuk je armiku ynë. Ti je vetëm një sfidë që, në ditën kur nuk do të jesh në drejtimin e vendit, për shtetin dhe qytetarët do të bëhet shumë më mirë. Shihemi në zgjedhje, atje ku ky popull i abuzuar politikisht nga ti për shumë vjet, do të flasë me votë. I paaftë!”, shtoi Çitaku.
