Bujar Osmani ka reaguar në lidhje me zhvillimet e fundit rreth protestave të studentëve shqiptarë, duke akuzuar Qeverinë për paraqitje të shtrembëruar të situatës para komunitetit ndërkombëtar.
Në reagimin e tij, Osmani theksoi se ka informuar përfaqësues të komunitetit ndërkombëtar mbi përpjekjet e autoriteteve për t’i paraqitur protestat studentore si të motivuara partiakisht, duke krijuar, sipas tij, një perceptim të pasaktë për realitetin në vend. Ai nënvizoi se këto përpjekje nuk reflektojnë shqetësimet reale të studentëve, të cilat lidhen drejtpërdrejt me zbatimin e të drejtave ekzistuese.
Më tej, Osmani bëri të ditur se në komunikimet me partnerët ndërkombëtarë ka sqaruar edhe, sipas tij, interpretimet e pasakta lidhur me opinionin e Komisionit të Venecias. Ai theksoi se opinioni i marsit 2025 nuk trajton kufizimin e të drejtave gjuhësore dhe nuk i referohet drejtpërdrejt legjislacionit vendor, por fokusohet në aspektet praktike të zbatimit, si kostoja dhe mbështetja logjistike, duke i cilësuar këto si standarde minimale që duhet të përmbushen.
Në fund, Osmani vlerësoi se në një moment kur kërkohet zbatim i plotë i të drejtave, është thelbësore që komunikimi me komunitetin ndërkombëtar të bazohet në fakte dhe në paraqitje të drejtë të realitetit./Ora24.tv
Postimi i plotë
