Shkrimtari shqiptar Arben Idrizi, poet dhe përkthyes i njohur, është përfshirë në listën e 14 autorëve të nominuar për Çmimin Evropian të Letërsisë, “European Union Prize for Literature (EUPL)”, duke e vendosur atë në qendër të vëmendjes së letërsisë evropiane bashkëkohore.
Idrizi, i lindur në vitin 1974, ka botuar njëmbëdhjetë libra, përfshirë dhjetë koleksione poezish dhe një vëllim me tregime të shkurtra. Ai ka përkthyer në shqip vepra të autorëve të shquar evropianë, si Valerio Magrelli, Tino Caspanello, Roberto Calasso, Giacomo Leopardi dhe Cesare Pavese.
Libri i tij i nominuar, “Njeriu që habitej dhe tregime të tjera”, është një përmbledhje prozeje që trajton temat e dhunës, traumës dhe habisë si gjendje ekzistenciale të jetës njerëzore përballë historisë. Qendër e tregimeve është figura e Isak Kodrës, një mbijetues i një masakre gjatë luftës, i cili mbetet i ngrirë në një gjendje të përhershme habie. Përmes një serie tregimesh të lidhura tematikisht, Idrizi krijon një univers të errët ku dhuna dhe absurditeti i historisë trajtohen si mënyra të të ekzistuarit dhe të përjetuarit.
Ky nomim e vendos Arben Idrizin në mesin e shkrimtarëve më të shquar evropianë të letërsisë bashkëkohore dhe i jep mundësinë të promovojë krijimtarinë shqiptare në skenën ndërkombëtare./KultPlus.com
