Strugë – Një hap i rëndësishëm drejt modernizimit të shërbimeve publike po ndërmerret në Strugë. Përmes një bashkëpunimi institucional, po punohet për lehtësimin e procedurave administrative, duke ua kursyer qytetarëve kohën, lodhjen dhe vrapimin nga një institucion në tjetrin.
Në një takim të mbajtur në Qendrën për Punë Sociale në Strugë, Edmir Tela, së bashku me Suzana Spiroskën, udhëheqëse e Njësisë Rajonale të Strugës pranë Ministrisë së Bujqësisë, Pylltarisë dhe Ekonomisë së Ujërave, diskutuan për koordinimin ndërinstitucional në lidhje me sigurimin e vërtetimeve për kontratat e përdorimit të tokës bujqësore, dokumente që u nevojiten përfituesve të ndihmave sociale.
Ajo që e bën këtë nismë veçanërisht të rëndësishme është fakti se këto dokumente do të sigurohen në mënyrë elektronike, drejtpërdrejt mes institucioneve, pa pasur nevojë që qytetarët t’i kërkojnë vetë. Kjo do të thotë më pak burokraci, më shumë efikasitet dhe shërbime më të shpejta për qytetarët.
Kjo iniciativë synon jo vetëm thjeshtësimin e procedurave administrative, por edhe përmirësimin e qasjes në shërbimet publike, veçanërisht për kategoritë më të ndjeshme sociale.
Me këtë qasje, Edmir Tela dëshmon se bashkëpunimi institucional është çelësi për një administratë më funksionale dhe më afër qytetarit, duke e vendosur Strugën në rrugën e reformave konkrete dhe të prekshme.
Edmir Tela: Lehtësim i procedurave administrative për qytetarët përmes bashkëpunimit institucional në Strugë
