Shkup, 4 janar – Pas festës së Vitit të Ri, sheshi i Shkupit këtë fundjavë ishte më i zbrazët. Përsëri ishin vizitorët e huaj që mbushën Çarshinë e Vjetër të Shkupit, duke i shpenzuar qindarkat e fundit në blerjen e suvenireve dhe bizhuterive, përpara se të kthehen drejt vendeve të tyre.
Një turiste nga Rumania e cila kërkonte të blejë punim artizanal në një artari të çarshisë, tha se vetëm për tre ditë ka shpenzuar mbi 1000 euro. Ndërsa një tjetër vizitor nga Malajzia, tha se e ka filluar ditën me blerjen e një suveniri që ka kushtuar rreth 60 euro.
“Jemi rrugës për në shtetin tonë, ndaluam këtu në Shkup, sepse dëgjuam se është një qytet i bukur i rindërtuar pas vitit 1960 dhe dëgjuam që është qytetit i statujave. Deshëm të vizitojmë po ashtu edhe çarshinë e vjetër dhe më pas do të shkojmë në Sofje dhe më pas do të shkojmë në shtëpi në Bukuresht. – A mund tu pyes sa para shpenzuat? – Më shumë se sa planifikuam. Mendoj se më shumë se 1000 euro, që nga 30 dhjetori”, tha një turiste.
