VMRO-DPMNE ka akuzuar publikisht Venko Filipçen se është kapur në një gënjeshtër të madhe lidhur me marrjen e vizës së artë në Dubai, duke kërkuar përgjigje të qarta se sa para ka investuar dhe mbi çfarë baze e ka siguruar këtë vizë.
Sipas Manasievskit, për të marrë vizë të artë në Dubai nevojitet një investim minimal prej 500.000 dollarësh, qoftë në pasuri të paluajtshme apo në biznes. Ai thekson se publiku ka të drejtë të dijë nëse Filipçe e ka marrë vizën përmes një investimi të tillë, blerjes së një apartamenti apo përmes ndonjë aktiviteti biznesor.
“Filipçe deri më tani nuk ka dhënë përgjigje nëse ka apo jo apartament në Dubai dhe nëse pikërisht kjo ka qenë baza për marrjen e vizës së artë. Në vend të heshtjes, qytetarët presin fakte dhe dokumente,” u shpreh Manasievski.
Në deklaratë përmendet edhe dëshmia e Toma Avramskit, ish-bashkëpunëtor i Zoran Zaevit, i cili ka deklaruar se ka parë ndërtesën 42-katëshe që po ndërtohet nga Zaev në Dubai, si dhe apartamentet që, sipas tij, u përkasin Zaevit dhe Filipçes. Edhe për këto pretendime, thuhet se Filipçe nuk ka dhënë përgjigje konkrete.
Manasievski shton se Filipçe ka konfirmuar se Zaev po ndërton një ndërtesë 42-katëshe në Dubai, por ka mohuar të ketë qenë partner në këtë projekt. Kjo, sipas tij, e bën edhe më të paqartë mënyrën se si Filipçe ka siguruar vizën e artë.
“E ftojmë Filipçen të paraqesë dokumentet mbi bazën e të cilave e ka marrë vizën e artë. Nëse ka pasur ndonjë angazhim profesional, punë në ndonjë spital apo marrëveshje tjetër pune në Dubai, kjo mund të dëshmohet lehtë me dokumente,” thuhet në reagim.
Sipas Manasievskit, pavarësisht premtimeve, Filipçe nuk ka paraqitur asnjë dokument, gjë që, sipas tij, tregon se dokumente të tilla nuk ekzistojnë. Ai përfundon se Filipçe po ndjek hapat e mentorit të tij, Zoran Zaev, si në planin privat ashtu edhe në atë partiak, duke theksuar se për këto çështje duhet të ketë përgjegjësi.
