Grupi këshilltar i VMRO-DPMNE-së dhe Koalicioni i Qytetit të Shkupit njoftuan se Plani për menaxhimin e cilësisë së ajrit në Shkup do të përgatitet nga ekspertë të dëshmuar me përvojë dhe projekte të suksesshme, duke theksuar se lufta kundër ndotjes së ajrit nuk duhet të udhëhiqet nga fushata PR, por nga masa konkrete dhe të matshme.
Sipas tyre, masat e parashikuara në plan do të mbështeten nga autoritetet e qytetit, ndërsa në realizimin e tyre do të kërkohet matshmëri e rezultateve dhe llogaridhënie e plotë. Një pjesë e masave pritet të financohen me mbështetje të jashtme, ndërsa pjesa tjetër do të financohet nga buxheti i qytetit, përkatësisht nga paratë e qytetarëve.
Nga VMRO-DPMNE theksojnë se fondet publike nuk guxojnë më të shpenzohen në projekte me cilësi të dyshimtë, pa rezultate të dukshme dhe të përgatitura nga persona pa kompetenca profesionale. Ata vlerësojnë se çështja e ajrit të pastër lidhet drejtpërdrejt me shëndetin e qytetarëve dhe veçanërisht me shëndetin e fëmijëve.
“Shëndetin tonë dhe të fëmijëve tanë nuk do t’ua besojmë atyre që suksesin e matin vetëm me numrin e pëlqimeve në rrjetet sociale, por atyre që ofrojnë rezultate reale dhe të matshme”, thuhet në reagim.
Nga grupi këshilltar shtojnë se zgjidhja e problemeve me ndotjen e ajrit do të bëhet përmes përfshirjes së ekspertëve të vërtetë, duke nënvizuar se kjo është çështje shëndeti publik dhe jo interes politik apo karriere individuale.
Ata gjithashtu rikujtojnë se përvojat ndërkombëtare tregojnë se lufta kundër ndotjes së ajrit është një proces afatgjatë, i cili nuk fillon me aksione të përkohshme PR në ditët me ndotje të lartë, por me një plan të qartë, sistematik dhe me zbatim të vazhdueshëm të masave.
