Partia opozitare VMRO-DPMNE reagoi ashpër ndaj deklaratave të ish-ministrit të Shëndetësisë, Venko Filipçe, duke e akuzuar atë se “po e ndjek skenarin bullgar” dhe “po e poshtëron shtetin e vet”. Në komunikatën e lëshuar nga partia, theksohet se Filipçe dhe “mentori i tij nga Strumica” janë përgjegjës për “tradhtinë dhe pranimin e marrëveshjeve të dëmshme”, për shkak të të cilave, siç thuhet, vendi tani po përballet me “shantazhe dhe presione” nga jashtë.
“Skenari që Filipçe e ndjek është i qartë dhe i dirigjuar nga interesat e huaja, por Maqedonia do të vazhdojë me reformat dhe me rrugën e saj drejt Bashkimit Evropian”, thuhet në reagimin e VMRO-DPMNE-së.
Sipas partisë, raportet ndërkombëtare që lidhen me progresin e vendit shpesh janë përdorur si mjete presioni politik, por ato nuk do ta ndalojnë përkushtimin për përmirësime të brendshme. “E shohim raportin si udhërrëfyes që tregon drejtimin e reformave, pavarësisht toneve kritike apo paragjykimeve të mundshme”, thekson më tej komunikata.
VMRO-DPMNE gjithashtu e akuzon Filipçen se po përpiqet të krijojë panik në opinion para fushatës zgjedhore, duke e cilësuar atë si “peng të interesave të caktuara” dhe “të varur nga ndikimet e jashtme”.
Në fund të deklaratës, partia opozitare thekson se mbetet e përkushtuar ndaj anëtarësimit të Maqedonisë në Bashkimin Evropian. “Qëllimi ynë është integrimi evropian, por ai duhet të ndodhë pa kushte të padrejta dhe pa presione nga asnjë shtet fqinj. Jemi të gatshëm për dialog, por në baza parimore”, përfundon komunikata e VMRO-DPMNE-së.
