Në prag të zgjedhjeve lokale që mbahen sot, më 19 tetor 2025, hoxha i njohur Dr. Zekerija Bajrami ka drejtuar një mesazh të fortë vëllazëror dhe moral për qytetarët shqiptarë, duke bërë thirrje për unitet, maturi dhe përgjegjësi gjatë procesit zgjedhor.
Në porosinë e tij, Dr. Bajrami thekson rëndësinë e daljes masive në votime, duke e cilësuar si akt kombëtar dhe moral:
“Të dalim sa më shumë në votime, sepse me numrin tonë tregojmë se ne shqiptarët nuk jemi pakicë në këtë vend.”
Ai u bëri thirrje qytetarëve që gjatë ditës së zgjedhjeve të sillen me dinjitet dhe respekt ndaj njëri-tjetrit, pavarësisht bindjeve politike:
“Të mos shprehim arogancë, të mos zihemi e as të ofendojmë njëri-tjetrin, ngase ne jemi vëllezër dhe secili voton për atë që mendon se është më i miri.”
Në vijim, hoxha i njohur kujtoi se vota është amanet dhe përgjegjësi para Zotit, prandaj duhet dhënë vetëm atij që e meriton, jo për interesa personale apo partiake.
“Të mos na mashtroj interesi grupor apo personal. Vota është emanet, ndaj duhet t’i jepet atij që meriton.”
Duke folur për natyrën e pushtetit, Dr. Bajrami theksoi se posti nuk është privilegj, por përgjegjësi, duke kujtuar shembullin e dijetarit të madh Ebu Hanife, i cili u burgos për shkak të refuzimit të posteve.
Ai po ashtu theksoi se partitë janë të përkohshme, ndërsa populli mbetet përjetësisht bashkë:
>“Partitë vijnë e shkojnë, kurse populli mbetet. Partitë janë si uji që vjen e shkon, kurse populli është si rëra – mbetet në vend.”
Në fund, Dr. Bajrami u lut që zgjedhjet të kalojnë në paqe dhe harmoni:
“E lusim Allahun e Lartëmadhëruar që të na vetëdijësojë, të na udhëzojë dhe të kalojmë këto zgjedhje sa më mirë, të dalim faqebardhë dhe të jemi shembull për të mirë! Allahumme Amin!”
