Aktori i njohur italian, Remo Girone, ka ndërruar jetë më 3 tetor 2025, në moshën 76-vjeçare, në shtëpinë e tij në Monako.
Lajmi ka tronditur botën e artit dhe miliona fansa në mbarë globin, përfshirë publikun shqiptar, që prej dekadash e identifikon me rolin e paharrueshëm të Tano Cariddi në serialin kult “La Piovra”.
I lindur më 1 dhjetor 1948 në Asmara të Eritresë dhe i rritur në një familje italiane, Girone e nisi rrugëtimin artistik që në moshë të re. Në 13 vjeç u transferua në Romë, ku studioi në Akademinë Kombëtare të Arteve Dramatike “Silvio D’Amico”, duke u diplomuar si aktor profesionist.
Karriera e tij shkëlqeu në teatër, televizion dhe kinema ndërkombëtare. Përveç suksesit të jashtëzakonshëm në “La Piovra”, ai interpretoi role të spikatura në filma si Ford v Ferrari (2019), ku portretizoi Enzo Ferrarin, dhe Live by Night (2016), si mafioz italiano-amerikan. Ai u shfaq gjithashtu në seriale të njohura si Killing Eve dhe The Equalizer 3 (2023).
Në vitin 2021, Girone u nderua me Çmimin për arritje në karrierë në Festivalin e Filmit të Venecias dhe Çmimin e jetës në Festivalin Flaiano, duke u vlerësuar si një prej figurave më të rëndësishme të artit dramatik italian.
Aktori ishte i martuar me aktoren Victoria Zinny që nga viti 1982, me të cilën ka një vajzë, Veronika.
Remo Girone do të mbetet në kujtesën e publikut si një ikonë e ekranit dhe një artist i pakohë, që i dha jetë personazheve më komplekse dhe të paharrueshme të kinemasë./KultPlus.com
