Shkup, 1 Tetor 2025 – Deputeti i VMRO-DPMNE-së, Antonio Milloshoski, në një konferencë për media komentoi qëndrimet e Venco Filipçes, kryetar i SDSM-së, lidhur me propozimin francez dhe rezolutën e re që Filipçe e ka paraqitur me “vija të kuqe” për mbrojtje të interesave kombëtare.
Milloshoski e quajti qëndrimin e Filipçes të papërgjegjshëm dhe kontradiktor, duke theksuar se ai po sillet sipas interesave personale dhe të Zoran Zaevit, për të ruajtur pushtetin në SDSM.
“Filipçe më 1 tetor 2024, në një konferencë për shtyp, e quajti propozimin francez fitore dhe sukses të madh diplomatik. Por sot, një vit më vonë, ai propozon rezolutë me ‘vija të kuqe’ për mbrojtje nga po i njëjti propozim. Kjo është hipokrizi e pastër,” tha Milloshoski.
Ai pyeti nëse Filipçe ka gënjyer vitin e kaluar kur e quajti propozimin francez fitore, apo po gënjen sot kur tenton ta portretizojë atë si kërcënim për shtetin.
“Venco Filipçe nuk di të ndërtojë as autostradë e as qendër klinike, por është shumë i aftë, bashkë me guruin e tij Zoran Zaev, të vënë nënshkrim dhe vulë në çdo dokument që do ta nënshtronte më tej Maqedoninë, njësoj siç bëri Bujar Osmani me pranimin e propozimit francez dhe anekseve në favor të Sofjes,” tha ai.
Milloshoski theksoi se ndryshimi i qëndrimeve nga Filipçe nuk është një sinjal ndaj qytetarëve të Maqedonisë, por një mesazh për Bullgarinë dhe aktorët ndërkombëtarë, prej të cilëve, sipas tij, Filipçe pret mbështetje për të qëndruar në krye të SDSM-së pas humbjes së pritur në zgjedhjet lokale.
“Filipçe e di se nuk ka mbështetje nga qytetarët, as nga shumica e simpatizantëve të SDSM-së. Prandaj, kjo rezolutë e tij është përpjekje për shpëtim personal dhe për të ruajtur pozitën në parti, jo për interesin kombëtar,” shtoi Milloshoski.
Ai gjithashtu tha se mesazhet e Filipçes janë fjalë të shkruara nga Zoran Zaev, pa asnjë qëndrueshmëri apo kredibilitet, duke e akuzuar se po krijon konfuzion në pozicionin e jashtëm të Maqedonisë dhe po i sjell përfitim vetëm Bullgarisë.
“Filipçe e ka të qartë se do të humbasë në zgjedhjet lokale. Lufta e tij e vetme është të mbetet në krye të SDSM-së, e cila sot është kthyer në pronë private të tij dhe Zaevit,” deklaroi Milloshoski.
Ai e mbylli konferencën me një apel: “Në vend që të propozojë rezoluta për vija të kuqe ndaj propozimit francez, Filipçe le të propozojë rezolutë për reforma të brendshme serioze në SDSM – një parti që është pushtuar nga oligarkë të pasur dhe interesa private.”
