Ministri i Vetëqeverisjes Lokale, Zllatko Perinski, në paraqitjen e tij sonte në emisionin “Klik Plus” në TV21, dha mendimin e tij për disa tema politike, foli për riaktualizimin e çështjes së modelit zgjedhor, për zhvillimet e fundit në Qytetin e Shkupit, si dhe u ndal edhe në procesin reformues të Ligjit për vetëqeverisje lokale.
Në lidhje me kornizën ligjore të propozuar për ndryshim, ai theksoi se është i bindur që me këto ndryshime do të rritet kapaciteti i demokracisë direkte në kuadër të vetëqeverisjes lokale.
“Ndryshimet e propozuara të këtij ligji sistemor kanë për qëllim përmirësimin e tij; ato nuk kanë asnjë pasojë as për ndonjë palë politike, as në aspektin operativ. Unë sinqerisht shpresoj që disa subjekte politike do ta tejkalojnë krenarinë e tyre dhe do ta mbështesin këtë zgjidhje ligjore, sepse ajo vetëm sa e rrit potencialin demokratik në nivel lokal”, theksoi ministri.
Ai informoi se nga gjithsej 288 projekte të aprovuara në thirrjen e parë të Qeverisë, për 273 tashmë janë nënshkruar kontratat dhe po realizohen në terren; konkretisht, 79 projekte janë përfunduar, ndërsa për 14 projekte janë rishpallur procedurat për përzgjedhjen e realizuesit.
Ministria po punon me përkushtim edhe në zhvillimin e barabartë rajonal, që, sipas Perinskit, është sfidë edhe për shtete më të mëdha dhe më të zhvilluara evropiane sesa Maqedonia.
“Mjetet asnjëherë nuk janë të mjaftueshme, për shkak të faktorëve të paparashikueshëm. Ajo që po bëjmë aktualisht në Ministri është ndarja e 116 milionë denarëve për 47 projekte, por edhe ato nuk janë të mjaftueshme. E kemi të qartë se në të kaluarën ka pasur anomali. Ajo në të cilën po fokusohemi tani dhe që po e zhvillojmë në kuadër të Ministrisë është mënyra se si të krijojmë një politikë të zhvillimit të barabartë që do t’i nxisë qytetarët të kthehen në vendbanimet nga kanë emigruar. Thelbi i zhvillimit rajonal është pikërisht ky: të ketë sa më pak dallim mes komunave të zhvilluara dhe atyre të pazhvilluara”, tha ministri në paraqitjen e tij sonte në TV21.
