Një djalë 13-vjeçar afgan bëri një udhëtim të rrezikshëm nga Kabuli në Delhi, duke u fshehur në ndarjen e ingranazhit të rrotave të uljes së një aeroplani pasagjerësh të kompanisë “Kam Air”. Zyrtarët thanë se adoleshenti, i cili është nga qyteti Kunduz në Afganistanin verior, u gjet duke bredhur në pistën e aeroportit ndërkombëtar të Delhit pasi aeroplani u ul të hënën.
Ai u ndalua nga personeli indian i sigurisë dhe u mor në pyetje për disa orë para se të dërgohej përsëri në Kabul me të njëjtin fluturim. Djali thuhet se u tha autoriteteve se e bëri udhëtimin nga kurioziteti.
Një zëdhënës i Forcës Qendrore Indiane të Sigurisë Industriale tha se djali arriti të udhëtonte i pazbuluar në fluturimin RQ-4401 të “Kam Airlines”, i cili u ul në Delhi rreth orës 11:10 të dielën.
Policia e gjeti atë duke bredhur vetëm dhe e mori mënjanë për ta marrë në pyetje. Djali thuhet se u tha autoriteteve se ishte fshehur në ndarjen e pasme qendrore të ingranazhit të uljes së aeroplanit. Stafi i linjës ajrore gjeti gjithashtu një altoparlant të vogël me ngjyrë të kuqe pasi u kryen inspektime të mëtejshme sigurie.
Gazeta “Indian Express” raportoi se 13-vjeçari donte të udhëtonte për në Iran dhe nuk e dinte se fluturimi me të cilin kishte hipur ishte drejtuar për në Delhi, jo për në Teheran.
Sipas gazetës, djali hyri fshehurazi në aeroportin e Kabulit, ndoqi një grup pasagjerësh dhe u fsheh në hapësirën e rrotave të pasme të avionit – ndarjen e brendshme ku ndodhet sistemi i uljes. Ai mbante me vete vetëm altoparlantin me ngjyrë të kuqe.
Kohët e fundit ka pasur incidente të udhëtarëve të fshehtë në fluturime për në SHBA ose Evropë, shpesh duke ikur nga vendet e tyre të origjinës. Por shumë pak prej tyre ia dalin të gjallë.
Ekspertët thonë se shumë udhëtarë të fshehtë që mbijetojnë fluturime të tilla shpesh janë pa ndjenja gjatë zbritjes, duke i vënë në rrezik të rrëzohen dhe të vdesin kur sistemi i zbritjes ulet.
Në vitin 2022, një 22-vjeçar nga Kenia u gjet i gjallë në hapësirën e rrotave të një aeroplani mallrash në Amsterdam. /BBC
