Pagesa e pensioneve po zhvillohet normalisht, njofton Fondi për Sigurim Pensional dhe Invalidor i Maqedonisë (PIOM), duke shtuar se pagesa e pensioneve të nëntorit do të fillojë me kohë, më 1 dhjetor, me një shumë të përgjithshme prej 9.297.493.427 denarësh.
Nga Fondi theksojnë se pensionistët duhet të jenë të qetë, pasi Qeveria garanton pagesën e rregullt dhe të përkohshme të pensioneve. Pagesa, që realizohet çdo ditë të parë të muajit në koordinim me Qeverinë, do të vazhdojë të kryhet në të njëjtën mënyrë edhe gjatë vitit 2026.
Fondi informon se janë siguruar mjete edhe për vitin 2026. Në Buxhetin e Republikës së Maqedonisë për vitin 2026 do të parashikohen 151 miliardë denarë për pagesën e pensioneve të rritura, sigurimin shëndetësor të pensionistëve dhe mbulimin e kostove tranzitore për tre shoqëritë pensionale të shtyllës së dytë.
Sipas Fondit, totali i mjeteve për pagesën e pensioneve në vitin 2026, së bashku me harmonizimet, do të jetë më i lartë për 30 miliardë denarë, apo rreth 500 milionë euro.
Ata shtojnë se nga 1 tetori 2024 deri më 1 tetor 2025, pensionet janë rritur nominalisht me 6.000 denarë.
Rritja përqindore, deri me pensionin e shtatorit 2025, arrin rreth 29 përqind krahasuar me pensionin e muajit gusht 2024.
Nga Fondi theksojnë se këto rritje dhe harmonizime synojnë përmirësimin e standardit të jetesës së pensionistëve dhe zbutjen e ndikimit të inflacionit. Ata shtojnë se rritja prej 29 për qind është dukshëm më e madhe sesa inflacioni vjetor, i cili për vitin 2024 është 3,5 për qind, ndërsa për vitin 2025 pritet të jetë 3,9 për qind.
Sipas Fondit, gjatë 30 viteve të fundit, pensionet nuk kanë shënuar asnjëherë rritje kaq të lartë brenda një periudhe prej një viti.
Kujtojmë se, kjo komunikatë e Fondit vjen pas debatit publik të ditëve të fundit mes Gjykatës Kushtetuese dhe kryeministrit Hristijan Mickoski.
Më 20 nëntor, Gjykata Kushtetuese njoftoi se ka hapur procedurë për vlerësimin e kushtetutshmërisë së nenit 2 të Ligjit për sigurim pensional dhe invalidor, me të cilin u fut rritja lineare e pensioneve. Me hapjen e kësaj procedure, Gjykata do të shqyrtojë nëse zgjidhja ligjore është e arsyeshme dhe e balancuar në masën e duhur.
