Ora24.tv – Vjeshta gjithmonë sjell një freski të re në botën e modës. Për të mësuar më shumë rreth trendeve, rikthimeve klasike dhe ndikimit të rrjeteve sociale këtë sezon, biseduam me kreatoren e njohur të modës, Arbesa Abazi. Ajo ndan me ne vizionin e saj mbi stilin, elegancën dhe copat bazë që çdo vajzë apo grua duhet të ketë në garderobë.
Cilat janë trendet më të mëdha të modës për këtë vjeshtë?
Sa i përket veshjeve të përditshme për këtë vjeshtë, komoditeti është fjala kyçe. Në trend janë mëngët e fryra, qofshin ato tek xhupat, këmishat apo sakot. Në krye të skenës së modës këtë sezon qëndrojnë edhe bluzat dhe fanellat me printe të ndryshme, si ato me motive leopardi, zebre apo që imitojnë lëkurën e gjarprit.
Te pantallonat, markat e njohura kanë sjellë mendafshin si material dominues, por nuk mungojnë as versionet praktike si xhinset apo stofi, të gjitha shumë të rehatshme për përdorim të përditshëm.
Në paletën e ngjyrave, këtë vit mbizotëron kafeja e errët, ndërsa vjollca dhe e kuqja janë gjithashtu shumë të pranishme. Për aksesorë, trend janë kapelat në formë sheshiri dhe dorezat e gjata elegante. Kurse tek këpucët, më të preferuara mbeten ato prej lëkure – qofshin me taka apo pa, si dhe çizmet e gjata.
“Mendimi im si kreatore është që çdo vajzë të fokusohet te eleganca dhe klasikja, sepse këto elemente nuk dalin kurrë nga moda dhe të bëjnë të ndihesh gjithmonë fantastike,” thekson Arbesa.
A po rikthehen ndonjë prej trendeve të vjetra këtë sezon?
Po, rikthimi i detajeve vintage është më i dukshëm se kurrë. Gjithçka e vjetër mund të jetë sërish e re, nëse i përshtatet trupit dhe stilit personal. Shpesh ndodh që një dizajn klasik të rikthehet pas shumë vitesh, sepse ka një estetikë që i reziston kohës.
“Kreatorët frymëzohen nga siluetat e së kaluarës, por i modelojnë në mënyrë bashkëkohore, duke përdorur materiale e tekstura të reja dhe prerje më të pastra. Ky sezon është një dëshmi e qartë që moda është ciklike – me fundet me bel të lartë, xhaketat e gjera të stilit të ’80-ës dhe aksesorët e frymëzuar nga vitet ’70 e ’60,” – shton Abazi.
Si ndikojnë rrjetet sociale në trendet e vjeshtës këtë vit?
“Rrjetet sociale kanë një rol thelbësor. Ato jo vetëm që e përshpejtojnë ciklin e modës, por e bëjnë atë global brenda pak minutash. Një koleksion i ri që prezantohet diku në botë mund të bëhet viral brenda orëve dhe të ndikojë drejtpërdrejt në stilin e përditshëm të njerëzve kudo,” – thekson Abazi.
Sipas saj, rrjetet sociale janë një burim i pashtershëm frymëzimi, por secili duhet të ruajë stilin autentik:
“Moda ka më shumë kuptim kur reflekton veten tënde.”
Cilat janë copat që çdo vajzë apo grua duhet të ketë në gardërobë këtë sezon?
Arbesa thekson se një gardërobë e kompletuar duhet të ketë disa elemente bazë, të cilat nuk dalin kurrë nga moda:
-
Fustani i zi klasik – i prerë mirë, i thjeshtë, që thekson bukurinë natyrale të trupit.
-
Sakoja klasike – e modeluar mirë, që mund të kombinohet si me pantallona ashtu edhe me fustan.
-
Xhaketa e ngushtë – për përdorim të përditshëm ose raste formale.
-
Shalli i gjatë prej mendafshi – që shton finesë dhe stil në çdo kombinim.
-
Këpucët elegante – të cilat plotësojnë me hijeshi çdo veshje.
“Nëse një grua ka këto elemente në garderobën e saj, ajo mund të ndihet gjithmonë e përgatitur dhe e kompletuar për çdo event. Sigurisht, përveç ndonjë ndeshjeje sportive, haha!” – thotë Arbesa me humor.
Intervista me Arbesa Abazin dëshmon se moda nuk është thjesht ndjekje e trendeve, por një gjuhë me të cilën secili shpreh personalitetin e tij. “Moda është më shumë se pamja, ajo është shprehja e karakterit dhe e stilit personal,” – përfundon dizajnerja.
