Një shpërthim i fuqishëm, i pasuar nga një seri detonimesh më të vogla, tronditi herët në mëngjes zonën e Magħtab-it në Maltë, pasi shpërtheu një fabrikë piroteknike.
Të paktën dy persona që ndodheshin pranë fabrikës u plagosën dhe u dërguan në spital. Policia bëri të ditur se në momentin e aksidentit nuk kishte asnjë punonjës brenda objektit.
Sipas raportimeve, forca e shpërthimit shkaktoi lëkundje në ndërtesat përreth, ndërsa banorët raportuan edhe dritare të thyera.
Dëshmitarët okularë thanë se shpërthimi u dëgjua në një distancë të madhe. Është raportuar gjithashtu dëmtim i konsiderueshëm i fermave që ndodhen pranë fabrikës.
Ekziston shqetësim për sigurinë e bagëtive, por fermerët nuk lejohen të kthehen në stallat e tyre derisa zona të vlerësohet si e sigurt.
Në terren janë angazhuar forca të policisë, ekipet e mbrojtjes civile dhe të ndihmës së shpejtë mjekësore, si dhe pjesëtarë të forcave të armatosura, të cilët po sigurojnë vendngjarjen.
Autoritetet u kanë bërë thirrje qytetarëve që të mos i afrohen zonës së rrezikut.
